المتحدث الاعلامي يلفت انتباه المشاهدين من الشعب الى ان فتح اماكن الدراي كلين ليست من اجل بدلات المسؤولين ابدا ابدا ابدا…. انها من اجل امور اكثر سموا مما نعرف ونفهم… نحن شعب قصير نظر ولا نفهم ولا نعي مشاكل الشعب الحقيقي… الدراي كلين سيتم فتحه من اجل شراشف المستشفيات وملابس الممرضين والاطباء… مستشفياتنا ما فيها غرف غسيل؟؟؟؟ وبيرسلوا الشراشف للدراي كلين… انافقدت التمييز، نحن دولة غنية بطرانه والا دولة فقيرة؟
الطلاب اللي ببيوتهم وما عندهم غسالات….. يا زلمة الناس عايشه ببيجاماتها صار لها ٤٠ يوم. الحقيقة ليه محتاجين يغسلوا بالدراي كلين، مش المفروض النس تضل قاعده ببيوتها. وبعدين الطلاب برأيك هلقد وضعهم المادي مترف وعندهم ترف ارسال الملابس للدراي كلين. يعني ونحن بطواريء معقول الطلاب ما عندهم طشت يبحّوا الغسيل فيه؟ بلاش طشت بالمغسلة . والله انا
اللي مفكرة حالي عشت بدلال ايام الجامعة ما خطر ببالي بحشرة مثل هذه اعيش ببذخ الدراي كلين …
معقول المتحدث فاهم انه طلابنا همه نفس طلابنا اللي رجعوا من الخارج؟ ووجدوا بدل غرف الحجر طابق كامل بالبيت ومصعد؟ م
روقوا يا جماعة والله في حد لكمّ المسخرة اللي عم نسمعها. الواحد بطّل عارف يركز حتى بموضوع مهم. نسينا الكورونا وصار تحديثات حياتنا عبارة عن طوشة مين بده يطلع يحكي قبل، ومين راح يقدّم لنا االذ طبق كنافة برمضان ومين سبب نقل العدوى ويا عيبه.
صارت تحديثاتنا عبارة عن اخترنا لكم اليوم اطرف تعليق واظرف متابع
العالم بتفتش على حلول من اجل انقاذ شعوبها من الفيروس بفتح مجال للعلوم انها تزدهر للاختراعات انها تطلع. طيب حدثونا عن اخر مستجدات الاجهزة اللي تم اختراعها بالجامعات الفلسطينية قبل اسبوعين؟ حدثونا عن اخر تطورات العلاج بالعالم؟ حدثونا عن المحاولات اللي بتبذلها السلطة بجامعاتها ومختبراتها عن ايجاد امصال وعلاجات؟
حدثونا عن اوضاع الاطباء والممرضين بمراكز الحجر والمستشفيات؟
حدثونا عن كيف الحكومة ناوية تشاركنا رغيف الخبز؟
حدثونا عن التقشف بمعاشات المسؤولين، وحدثونا عن الاموال التي يجب ارجاعها من قبل الوزراء؟
حدثونا عن وين الملايين بدها تنصرف بوقت الملاليم من مساعدات غذائية في ناس من اللي بوزعوها دقوا ببعض وكسروا ابواب ومكاتب؟
حدثونا عن القطاع الاهم من كهرباء وماء وهواتف نقالة وانترنت كيف بدهم يتعاملوا مع الفواتير؟