عزيزي المتحدث باسم الحكومة، ارحمني ، والله تعبت ومتضايقة من حالي. والله ما الك علي يمين اني بضل احضرك على امل انه يخلص تحديثك وانا مسكرة تمي … انا والله بطلت فاهمة هو ايجاز يومي حكومي من اجل حالة طواريء بسبب الكورونا بطريقة حكومة والا فتح باب الدعاء وبشر الصابرين وايعازك لنا بالتقلب للجنة؟ (مش فاهمه كيف بده الواحد يتقلب بالجنة بس ما علينا)
دور الحكومة مش انها تقول لشعب يفتحها مساعدات خيرية، الناس مش محتاجة نصائح لعمل الخير. وظيفة الحكومة انها توفر اساليب مختلفة عن اساليب الشحدة الجماعية وتوزيع الخبز عالمحتاجين. عزيزي المتحدث نحن زمان خلصنا من مرحلة كرت المؤن وما بدنا نرجع لها. ما بدنا تمنوا علينا ولا بدنا توزعوا صدقات. غير انها مش حر مالكم اللي بتوزعوه على الله اعلم مين ووين.
عزيزي المتحدث شو يعني مش ضروري نعرف ما هي المعايير ؟ برأيك شو الضروري ؟ يعني انا مثلا مواطن بحب اعرف كيف بدهم الناس يحصلوا على المساعدات اللازمة ومن هم اللي بتنطبق عليهم معايير المساعدات وما هي قيمة المساعدات؟
يعني ما هي المعايير اللي تم قرار فتح محلات الدراي كلين مثلا ولم يتم اعتبار قرار فتح محلات المجوهرات مثلا مرة بالاسبوع ؟ في ناس بدها تخطب ، تتزوج شو تعمل؟ بجد اي اهم الدراي كلين ام شراء دبلة خطوبة ؟
عزيزي المتحدث بموضوع انه ايجازك لازم يكون بساعة محددة معناه انه لازم يكون بهديك الساعة بالدقيقة مش بالاجمال يعني مثلا الساعة ١١ يعني ١١ مش ١١ و٥ ولا ١١ و١٠ ولا ١١ و١٥ الخخخخ. انه رئيس الوزراء ما عنده التزام بالوقت هذه مش صفة زائدة ايجابية بيتاخد عليها علامات وبتصير نهج حكومي. يعني ما تآخذونا بهالملاحظة، لا حضراتكم جايين عن حاجز ولا قاطعين مدن ولا محافظات. طالعين من الغرفة اللي ورا الباب .. يعني بجد بجد اشي مستفز. كنت بتمنى الاعلاميين اللي كانوا بدهم يعملوا مقاطعة للتحديثات بغيابك لما الوزيرة تعدت حدود صلاحياتها وعاقبتوا الصحفي اللي عمل اللقاء بالتوقيف بدل محاسبة المخطيء الاصلي ، انهم يعترضوا على بدون مؤاخذة قلة القيمة اللي بتصير بترك العالم اللي واقفة تصور واللي قاعدة قدام الشاشة تستنى.
انهم نو جود يو نو .. هذا اسمه استهتار وعدم احترام للمتلقين. الالتزام بالوقت قيمة اخلاقية وانسانية تدل على الاحترام. وعدم احترام هذه الخاصية بتدل على كثير امور. في امثلة واحاديث شريفة كثيرة بتحكي عن هذا الموضوع. ممكن الاهتداء اليها بسهولة.