هل هو ايجاز لتحديث جائحة الكورونا ام عرافة حفل؟
.المتحدث عايش دور عريف الحفل. والوزراء بيشكروا على الفرصة وبطلعوا عالمنصة
وين الكورونا ؟
ام هو سباق تجهيز لانتخابات ؟
. امبارح اكتشفنا انه الحكومة – حرفيا– عايشه عالشعب . طلع الشعب بيشتغل وبيدفع ضرائب والحكومة بتقبض وبتصرف عليها وعلينا. تخيلت فيلم لمحمود ياسين وفاتن حمامة ناسية اسمه، علشان الايجابية طبعا، علاقة الاقطاعي والفلاح. ولما يكون الاقطاعي عند الزنقة لطيف. ولكن مدير العزبة مش الطف اشي وبضل يحمل رب الفلاح جميلة على انه بيحرث عليه
وزيرة الصحة هي لحد هذه اللحظة اكثر وحدة مفيدة. مشكورة على محاولاتها لتحسين لغتهاالمقروءة… بس واضح في ازمة رفع المكسور او نصبه عندها شكله (بيلت ان
.(وزير الاقتصاد (كيوت) و بيشتغل مع زملائه الوزراء ( تيم وورك
المتحدث ، قصدي عريف الحفل حاول يعمل(تايم مانيجمينت) ولكن الله يسامحه لو ما تبنى نهج انه التأخير وجاهة ومن سمات الحكومة الناجحة كان اعطى زميله الوزير فرصة اكثر .
عندي سؤال المتحدث هو كمان اسمه معالي المتحدث؟ يعني دولة ومعالي وسيد البلاد تم تهميشه…
وير از هي؟؟؟ ليه ما بنادوه هو كمان معالي المتحدث؟
وزير الاقتصاد اخد على خاطره بعد ما تم قمعه… كمان خمس دقائق لوزير الاقتصاد كان راح يورجينا وجه تاني ما فيه (تيم بيلدينغ) ولا (تيم )اصلا. .
وزير الزراعة، والله طليق اللسان ، بس كنت حابة اسمع عن الاراضي الفالته للمستوطنين. والا الزراعة صارت عنا حدائق منزلية ؟؟ توسيع المساحات الخضراء ببيوتنا. انتاج ٦٠ الف طن خضار، ٦٠ الف بيضه الخخخ… حاسة الجماعة متفاجئين من الارقام مش مصدقين حالهم عالانتاج العظيم. الحقيقة ارقام كبيره خلتني اسأل قديه استهلاكنا وحاجتنا ، وليه هذا الرقم يبدو كبير غريب. اذا تاجر اسرائيلي واحد اخد ٢٠ الف بيضة من تاجر فلسطيني واحد بالعيزرية (مسكوا واحد ببيع بيض لاسرائييلي قبل اسبوع)؟ بتتذكروا درس الجغرافيا اللي كان يقول انه تشتهر فلسطين باراضيها الزراعية؟
علشان الحلال والحرام، انا وزير الزراعة ما بقدر اكون حيادية معه من وقت استيراد الزيتون اللي من نوع خاص من اسرائيل.
ملاحظة عامة، بتحس انه شغل الوزارات هو شغل تقني مش عملياتي. يعني عم بنفذوا مشاريع وبيحكوا ارقام. حاسة حالي باجتماع لادارة المشاريع متوسطة.
٣٣ الف عامل من ٣٦٠ الف ارتفعوا ل ٦٠ واشي الف. تخيلوا انه نحن العمالة تبعتنا معظمها في اسرائيل؟ عمالنا طلعوا مش بس ببنوا مستعمرات ، كمان بشغلوا مصانع ومنشآت اسرائيلية .
هلا عنجد همه خايفين عالبني ادمين؟؟؟؟ نحن ببلد ارخص اشي فيه البني ادمين. اتحولنا لشعب
شحاذ وبده يتقاسم معه اللي محتاج يودي بدلته عالدراي كلين رغيف الخبز.
.
“كمان وزير الاقتصاد بحب يقارن وضعنا ب“جيراننا
هلا الزلمة جاي يقدم ولاءات كان المتحدث قمعه وهو بيحكي، فقام “اقتنص” الفرصة لما فراس سأله سؤال مهم، ولكنه دخل بوضعية تذكير نفسه المبدئي بانه جاي على مؤتمر. فشكر كل القائمة اللي كان كاتب اسماءها ، لواء وولواء ولواء وامن ومخابرات وطبعا سيد البلاد ودولته……
!!بالنسبة للمواد الغذائية الواثق من وجودها … لانه توريدها مضمون
.مين فراس اللي الكل بيحكي معه حتى وزير الاقتصاد؟ شكله فراس قاعد قدام. لازم فراس يطلع معهم عالمنصة
وقتكم هلقد ثمين وبتحبوا تلتزموا بوقت الانتهاء المطلوب ، ابدأوا بالوقت المحدد اصلا.
وبعدين اذا جايبين ثلاث وزراء يحكوا والناس المفروض تسأل يعني وين الشفافية بالموضوع لما لا الوزير عنده وقت يشرح ولا الصحفي بيقدر يسأل؟ ام انه الخطة هي انه ما يطلع اسئلة اكثر ويصير في اجابات اكتر بتكشف ما هو مستتر ومستور ؟
واخيرا، المتحدث العريف ، ما انت كل يوم بتطلع وبتحكي مناجاة واشعار وسجع واحاديث وايات، مش ضروري دائما زاوية ما يطلبه المستمعون من متابعات اجمل تعليق واهضم اقتراح.
اللي بصير بذكرني بكتاب نبيل عمرو – وزير اعلام الحرب– للدعابة.. وللطم على حالنا بذكرني بكتاب ادوارد سعيد –القلم والسيف –وتصنيع النخب الفلسطينية الخاصة باوسلو
ولا حول ولا قوة الا بالله
انتهى الايجاز