بداية بجد بجد بجد ، اي ساعة الايجاز المفروض يكون؟ يعني مش معقول كل يوم نقعد نستنّى مثل اللي بستنى بهلال رمضان. ومع الايات الافتتاحية والدعوات واجواء رمضان عم بذكرني بأبي جرير معكم في هذا الدعاء ( الجيل الناشيء ما بيعرف ابو جرير اللي كنا نستناه قبل الافطار برمضان، كانت اهميته تفوق اهمية المدفع)
وبجد كمان، سلسلة الدعاوي والايات وبعدين التقديم بشكل عرافة، تحوّل الموضوع لحفل يتخلله فقرات، والعريف بدّه يتأكد انه هو النجم ودوره مش بس عرافة..
اليوم خربش بالدعاء مع انه والله انا وبنتي منكون قاعدين منسمّع معه حفظناه كرجة مي
ما علينا،
فهمنا على ما يبدو انه المتحدث السابق الشخرة شحروه ،طيب يوضحولنا.
بجد نحن قاعدين مثل اللي بحضر ستار اكاديمي، في معلومات لازم نبقى على تواصل معها بتحديثات ملزمة.
اليوم ضيوف الشرف مهمين، وزير الخارجية الابدي ووزير بوزارة جديدة لنغغغغ.
يعني كل اللي كان يسأل عن وزارة الريادة صار عنا فرصة تاريخية لرؤيتها بوزيرها.
بس يعني عنا اليوم وزير الخارجية، هذه فرصة تاريخية مهمة انه نشوف عن قرب وزير الخارجية التاريخي. (ملاحظة للدعابة، وانا بكتب بالعنوان وزير الخارجية طلع معي وزير المالكية ) وطبعا ما بينفع بدون فقرة الشكر والتقدير
وزير الخارجية محضر حاله عمللنا بريزينتيشن متعوب عليها ووافية جدا عن اشياء وتفاصيل ولا عمرنا سمعنا عنها في قطاع الخارجية ومش متأكده قديه بتعنينا. وبعترف اني بلحظات بطلت اميز مين دوره بشو. الكل بيشتغل نفس شغل الكل. يعني وصلت معي لانه وزير الخارجية حكى كمان عن العمال والحواجز ومش متاكده اذا حكى عن القدس وسلوان. يعني بفهم انه كان لازم يحكي عن مثلا شو عمل بموضوع وزير القدس اللي انحبس وانضرب. مش عارفة همه مثلا بقعدوا بعملوا رصد على المواضيع التريندينغ وبشوفوا شو اكتر كلمات بيجي عليها فولو وتعليق وبدخلوها بخطابهم؟ ما بعرف.
ما علينا،
وهو بيسمِّعنا شو وزارة الخارجية بتعمل ،ومغلبين حالهم انه بيعطونا هالمعلومات الدقيقة عن انه وزارة الخارجية ردت على ٩٠٠ رسالة وبعتوا رسائل تضامن بالرغم من الظروف الصعبة اللي بنعيشها. والله اني انا حاسة انه كل العالم نفسها يكون عندها كورونا على قياسنا. نحن قالبينها مؤتمرات استعراضية وما يطلبه المستمعون وشكر وامتنان وتعرّف على مكمونات الحكومة وانجازاتها ونجومها. حاسة ناقص نعمل مهرجان مثل مهرجانات المدرسة لما الصفوف الصغيره… او ليه الوصف ، مثل مديرة مدرسة شعفاط اللي عملت حفل استقبال رئيس بلدية القدس. لازم الحكومة تجيبها تنسق الايجازات بفقرة البراعم
وبعدين ليه هيك الجماعة متفاجئين من حالهم انه همه بتعاملوا مع الموضوع بجدية. وبشكروا بحالهم وبتلاقيهم مش مصدقين حالهم من انجازهم العظيم انهم بيشتغلوا.
وزير الخارجية عصّب تقريبا وما بيقبل انه حدا يقول انه هناك تقصير. طيّب يا معاليك ( هو اكتر حدا بيطلع له لقب معاليك لاقدميته الغير مسبوقة بالحكومة) انت بتقول انه بتشتغلوا على مدار الساعه وسمّيت فِرَق . ولجان بتعمل جيش، كيف يعني ممكن يفلت اتصال.
يعني برأيك المتصل اللي اتصل هو رن لمرة وحدة وحِرد وقرر يعترض؟
يعني بجد برده وحّد لي الله
والله ما الك علينا يمين، طلاب القدس ما بفكروا يحكوا مع حدا لانهم ساقطين من كل الحسب، يعني الحمدلله اولادنا ما بدخلوا مثلا بحسب المنح للطلاب الفلسطينيين لانهم من القدس ولا همه بنحسبوا على الطلاب الاردنيين لانهم مش اردنيين ولا ممكن نفكر نحطهم على الاسرائيليين، فهذه الازمة طلاب القدس ماخدينها من قاصرها ومش مغلبينكم.
طبعا نحن منحكي عن عامة الشعب ما بنحكي عن ابناء النخب اللي ما بتنطبق عليهم معايير
كم سؤال حيّروني
كيف قادرين يعرفوا عدد الاصابات وما بعرفوا عدد الطلاب العالقين
ماذا تعني كلمة ما يُسمّى باللاجئين الفلسطينيين؟
علشان افتراض حسن النية المقصود يعني اللي بيطلبوا لجوء سياسي؟ بجد المصطلح استغربت منه. ولكنا ذا حدا طالب لجوء سياسي بضل محسوب عالسفارة؟
انا مش فاهمة نحن الشعب على شو لازم نكون منصفين ؟ يعني نحن متفاجئين كنا انكم اشتغلتوا بهالازمة على غير ما عهدناه منكم. ولكن برده يعني كمان مزبوط نحن شعب فتح يديه لاكم من مسخم يهودي هرب من النازية لاننا قلبنا طيب وكرماء وبعدين ركبونا وفعصونا. .وهيك كمان منتعامل مع حكومة بتمتص دم الشعب وقضيته لحد ما صابنا انيميا وطنية
ولكن الشعب هذا بيميز بين اعطاء الفرصة وسحبها. وشرعيّتكم هي بهذا المحل الرخو متل الخاصرة اللي بيتفضّل فيها اخونا المتحدث. انا بصراحة بسمع وزير الخارجية وبفكر وهو بقول كيف بدّه يشكي ويسجّل تذكّرت محكمة الجنايات اللي قدموا فها طلب وهي مسكرة. بمر عن راسي عشرات القضايا اللي سمعنا عنها انفتحت والله يعلم وين راحت.. بس كمان ما علينا، نحن هلأ بالكورونا .
خلص بكفي وزير الخارجية لانه موضوعه ما بنفع فيه النكشات.
اقتباس مباشر من المتحدث : نقدم لكم الان وزير الريادة والتمكين المهندس اسامة السعدي
الوزير جاي يسمّع رسمي. كيف لما يكون عندك حفظ قصيدة وانت بصف تالت وبتخاف تنسى اي كلمه وبتغمض عينيك وبتكرها كر… او يعني اذا بدي اكون منصفة متل الاستاذ اللي بطلب من طالب صف عاشر يعمل برزينتشن عن الكورونا
هيك بالزبط..
مش عارفة كيف الريادة وتسميعه مِكْس؟؟؟
يعني كلامه وتسميعه ضد الريادة
بفهم ان هذا الوزير شغل وزارته يعمل ابليكيشنز- تطبيقات ومنصات الكترونية.
يعني مثلا بده يفهم الشعب كيفية استخدام زوم؟
صعب الواحد يفهم شو حكي لانه سمَّع اللي بيحكيه كرجة مي.وصوته واطي . بس كان مسموع لما قدّم الشكر والامتنان
بجد بجد بجد كتير بحب اعرف شو كان مواصفات الوظيفة لما اختاروا وزير الريادة ، انا لهلأ مش فاهمه شو يعني ريادة
ملاحظة اخيرة
حدا يقول للمتحدث انه هو موجود قدام الكاميرا يعني نحن شايفينه وهو بيعمل اشارات للصحفيين اللي بطلبوا يحكوا
ام بلال رسالتك وصلت. لقد تم تنصيبك مسؤولة طلاب ماليزيا