الحمدلله الحبايب تصالحوا وما كان في داعي لا لصلح عشائري ولا عطوة والعرسان روحوا عالبيت.
لازم كم ملاحظة مرت قدامي باللي صار ، اول اشي شكله موضوع حط اليد بالجيب هذه متلازمة، لانه المسكين ملحم لقى حاله بحط يده بجيبه لما عمل وصلة ابو جرير معكم في هذه الادعية وما تيسر من الآيات القرآنية. ولكنه تدارك الامر وقام يديه. ولكن شتية كمان حط يده وبعدين تدارك الامر وشال يده. الحقيقة هذا الموضوع اكتر واحد متضرر منه والى الأبد هو شتية لانه طلع دايما بحط يده بجيبه وماشي وواقف . يعني هلا كل ما يحط يده بجيبه راح يتذكر . منيحة هذه الرقابة الذاتية.
ما انتبهت اذا طلعوا عالموعد اليوم … هو مش مهم اليوم كان اكسترا سبيشل.
حبيت فكرة انه شتية طلع لنا بثوب وزير الأوقاف ، لقى تخريجة كيف يصالح فيها ملحم.
الواضح انه هو ما شاف حاله غلطان واعتبر الموقف مزاج بين اخوان او اصحاب والنَّاس اللي علقت كانت متصيده، يعني بتصير هذه الأمور بين الأحباب.
هلا هون شتية خربشلنا الموضوع من اول وجديد، يعني دور البروتوكول والرسميات هذه ننساها ؟ طيب اذا
الموضوع مش بروتوكول ليه طفست الزلمة هالطفسة؟
واضح انه ملحم بعد ايّام بعد هذه النجومية وهو راح يكون اول scapegoats الإخفاقات اللي راح تترتب على الكورونا.
ليه بقول إخفاقات ، لانه اللي بيصير هلا عم بتسمى إنجازات . يعني قهرنا الكورونا وانتصرنا وتوحدنا وشكرا وكل الأشياء غير المسبوقة. على سيرة الغير مسبوقة، رئيس الوزراء كل شيء بشوفه غير مسبوق . همه الجماعه متفاجئين من حالهم.
هو لو يثبت لنا جدارته وصدقه ووطنيته وكل الأشياء اللي قال لنا عنها ويقول لنا شو وضع معاشات الوزراء اللي لازم يرجعوها وقديه ناويه الحكومة تتبرع من نسبه رواتبها؟ هذه بدها وقفة عز .
موضوع حرية التعبير اللي حكى عنها ، بين غضبه من تعليق الناس على اللي عمله امبارح واستياؤه الواضح، وبين شكره للصحافة على إبراز الأمور الإيجابية بإدارة الأزمة ، للحقيقة ما بعرف وين حرية التعبير فيها ، بتجييش الصحافة علشان تتحول لبوق حكومة. وانا كمان بسأل فراس. وبطلب انه فراس يطلع عالمنصة- الكل اكيد صار يعرف فراس بس ما شافه متلي-
النقطة المريبة الاخيرة هي بموضوع عروض الوزراء ، اللي اعترف رئيسهم انه الناس عالارجح ما بتعرف أسماؤهم ، وله ان يتخيل معنا انه حكومة الها سنه بتشتغل الشعب ما بعرف معظم وزراءها . باستثناء وزيرة الصحة اللي من يوم ما صارت وزيرة وبلاوي سوء النظام يتنزل عليها ، والمسكينة بوز مدفع .
أشار رئيس الوزراء لانه السبب في عدم معرفتنا بالوزراء هو عدم وجود برلمان . للحظة فكرته بده يقول إن شاء الله تخلص عالازمة ويصير انتخابات وتتصوب الأمور، ولكن هذا تمني الساذجين امثالي .دولته نصبنا نحن الشعب برلمان وخلانا نصوت بالإيجاب لوزرائه.
يا خوفي بكرة نلاقي صور متل تبعت فوضناك الخاصة بابي مازن وتكون فيها فوضناك لأبو ابراهيم ووزراؤه.
اخر ملاحظة عن اليوم ، بدي سجل تعاطفي مع غسان اللي صار واقف فوق وما نابه من الحب ولا جانب. ذكرني بحالي لما كنت صغيرة واستنى رجال العيلة الكبار اللي بعيدوا علينا وهمه طالعين أوقف عندهم بلكي صح لي عيدية.