نكشات كورونية: شكرا سيادة الأخ اللواء شكرا سيادة دولة الرئيس شكرا سيادة رئيس دولة الرئيس …بسم الله وابقوا في منازلكم وأخيرا شكرا الطفل مجد اللي اجا وتبرع ما بقي في البيت!!!

والله اني بحاول بقدر المستطاع انه ما اعلق على الايجازات ، وعلشان هيك ما بحضر كثير…

ولكن المتحدث مش قابل يرحمني …

قبل كل شي، انا لو مكان الصحفيين اللي بكونوا يستنوا ما باجي، لانه بجد قلة قيمة وقلة احترام واستهتار هذا التأخير اللي صار هو الطبيعي والعادي بالايجازات اليومية. قولوا انه الموعد اشي وربع او ثلث. مش تكون الساعه في تمام كذا وتبدأوا بعد عشر او ربع ساعة او ثلث ساعة

واصر على فكرة مركزية وهي عدم احترام الوقت بيعطي انطباعات لكثير امور متعلقة بمصداقية الحكومة ، اللي صارت واضحة بفكر وبطل في داعي حدا يعلق…

ولكن ، انا ما فهمت شو فكرة الموشح الطويل اللي بدا فيه من اولا شكر رئيس الحكومة للرئيس، حاسة الموضوع صار مخاجلة، وبعدين كمان مرة شو فكرة المسافة بين دولة رئيس الحكومة ودولة الرئيس؟؟؟ كثير الموضوع عم بياخد شكل محدد!!!

الشيء الاخر، رجوع الناس العالقة بالاردن، فكرة التركيز او التأكد من ذكر سيادة الاخ الللواء وهذا ال extensive تأكيد على دور سيادة الاخ اللواء على جهوده، وطبعا ما بتعرف كيف لازم يشكر الاشخاص نفر نفر علشان ما يزعلوا الجماعة اللي مش سيادة الاخ اللواء من وزاير الخارجية والتنسيق والصحة وطبعا اشراف دولة رئيس الحكومة ، واكيد الاخوان الاشقاء بالاردن….

تخيلوا انه كل هذا اهم من انه يبدا ببسم الله ويجعل الله لكم من امركم وبشر الصابرين… strange الحقيقة

وبعدين….

الجدل والحديقة…والدول اللي بتدفع المليارات علشان اشي يطلع بانجازات الايجازات …. ولا حول ولا قوة الا بالله….. في حدا فاهم الموضوع كثير غلط… بس ان شاء العالم راح يكتشفوا الاعجاز العلمي الخاص بالايجاز ويتبنوه….

حكومة بتكشر وديروا بالكم!!!!!!! هههههههههه

ما يطلبه المشاهدين والا المستمعين وكمان لا حول ولا قوة الا بالله…

وخليك بالبيت وبيجيك البسكليت

ولما الشوكلاته ترتدي الاناقة

وكلمة ابقوا في منازلكم صارت copyright !!!

وبعدين ممكن يصير في برنامج فتاوي …

بصراحة صار عندي كثير افكار برامج بقدر المتحدث يعملها لما يبطل متحدث …

انا مش عارفة شو اللي خلى جورج اورويل يطلع عراسي من اول وجديد. شخصياته ممكن ينعمل منها مسرحية فلسطينية!!!

Leave a Reply