بفكرمسلسل ١٠٠ وش ( ١٠٠ وجه) لنيللي كريم هو الافضل.
نيللي كريم ممثلة تتفوق على نفسها في كل مرة. هذا الدور هو خارج عن المألوف اللي متعودين عليه. خفة دم، بنت حواري ، نصابة، مكياج واداء بتحس حالك قاعد معها بنص صالون الشعر.
بعكس المسلسلات الاخرى اللي بتركز على بطلة وحدة او بطل واحد، بتستمتع باداء فريق العمل من الممثلين . مش الكاميرا لاحقة وجه النجمة الوحيدة والاهم.
يعني بتحضر مسلسل ياسمين صبري، ومن اول حلقة لحد الحلقة ٧ او ٨ وهو الحدث يتمحور حوالين وجه . وشخص وشكل ياسمين صبري. بلوك- قالب- واحد متصنع.
وطبعا ما ننسى انه ايتن عامر موجوده ولسه بتصيح من اول المسلسل. بتهدا وبتفلت مرة وحدة.
نفس الشيء بصناعة النجوم، مسلسل رهام حجاج اللي بتحس خالد النبوي معها كومبارس. المسلسل عبارة عن وجهها وجمالها ومحاولاتها بمحاولة التمثيل مع شكلها الخارق الجمال.
مسلسل دينا الشربيني ، شرحه، وبعدين نفس ديباجة الحادث وفقدان الذاكرة، قرب يخلص المسلسل ونحن لسة مش داخلين على وين الحبكة بدها تضرب. وجه دينا الترابي وصوتها اللي ماسك نفس الايقاع وشعرها مسحوب او كيرلي بتسأل حالك اي احلى عليها، وشخصيات بكل المسلسلات هذه بتحس لازمها تشد حنكها.
افورة على رأي المصريين بالاداء ، بين انه الواحد مش فاهم شو مال الشخصية ، هي منيحة او شريرة او غاندي او الام تيرزا مع شنطة كريستيان ديور مرة ومع ايف سان لوران مرة تانية… تو ماتش بزيادة، لقصضة يعني انها تمط ل١٥ حلقة اصلا كثير.
مش متأكدة شو موقفي من مسلسل غادة عبد الرازق، اللي كمان بتذكرني بالمسلسل بدور دانييلا رحمة اللي عامله فيه رقاصة. غادة سلطانة المعز بتخليك تسأل يعني معقول في معلمة سلطانة بشارع المعز شكلها ممكن يكون بهذا الصفاء من الجمال والشكل والجسم والرواق اللي بتمثله غادة عبد الرازق؟ بوقت بتشوف شكل دانييلا سواء كانت رقاصة بكباريه او راقصة باليه نفس القالب اللهم حافظة الكلام بطريقة تانية، مش مستعدة تفكر اصلا تغير طريق المكياج اللي ممكن يخلينا نشكك بجمالها الرباني والملكوتي.
دانييلا رحمة علىالسيرة، وفكرة انها ترقص شرقي. مش عارفة هي بتقلد نانسي عجرم والا فيفي عبده!!
بموضوع الحبكة والسجن بالمسلسلات. مسلسل اولاد ادم، بتلاقي “قدرت” بمسلسل الفناء التركي بتقليد مش زابط. وموضوع التلفونات والتهريب وشو بصير بالسجن، ولكن بسلطانة المعز تفوقوا على نفسهم بموضوع الرسائل المهربة الملفوفة بكيس بلاستيك، او التلفون المهرب بختفي بالكيس النايلون الاسود.
الطخ والقتل ما بتفهم كيف واحد بكون يسوق سيارة بيقطعوا عليه طريق وبرشوا رصاص والدم بعبي الزجاج الامامي متل الكتشاب بدل ما الزجاج يتخزق
وغادة عبد الرازق… لازم تاخد اسوأ اداء بعد ياسمين صبري في بند الافورة. والشكل اللي ما بيتغير لا بعزاء ولا بفرح ولا بحادث ولا بسجن ولا ببيجامة ولا مرض ..هيك نسخة كربونة ..معقول عاملين وجه ما بروح منه المكياج بعد الغسيل ؟؟؟.
.مسلسل خيانة عهد بطولة يسرى، بفكر انه يسرى ابدعت.
حلا شيحة الحقيقة مش قادرة اشوف لها قيمة مضافة. لا تمثيل ولا شكل .. ما في روح بآدائها.
على سيرة الروح.. مسلسل جمع سالم وزينه. سؤال يراودني دوما، شو فكرة زينة؟ شو سرها؟ يعني شكلها حلو طيب تمام، بس يعني مش هيفاء وهبي بالآخر، وتمثيلها الواحد ما بفهم شو وضعه ، بكل بساطة بتحس الورقة الخاصة بالنص قدام عينيها، بتكون تسمّع تسميع الدور. وعينيها مفتحين بزيادة. بتذكرني ايام المدرسة والاداء على مسرح المدرسة لعمر ست سنوات. هي ناصحة والا ضعيفة كمان مش فاهمة، والدور من اول لاخره بذكر المشاهد بحياة زينة الخاصة، عندها قدرة على قلب الحق باطل والباطل حق ، والحق المراد فيه باطل، بالزبط مثل علاقتها باحمد عز وموضوع اولادها. هي طبيبة والواحد بفكر حاله بحضر ِاي آر او مسلسل تركي قبل ما تدخل غرفة العمليات وبتفهمش هي دكتورة شاذره عرايها، بتمثل انها دكتوره ومبسوطة على حالها، ومدمنة مخدرات او مهدئات ، وبتدخل على غرفة العمليات بتعمل وصلة ردح للاطباء ، هيك اشي بخربش المشاهد وببطل يميز شو بحضر. بس في واحد شرير ببرر وجوده اي عمل مضاد.
مسلسل نحن تاني ليه لياسمين عبد العزيز، ملاحظتين مشابهات من حيث المبدأ، هي ناصحة هلقد او شو الفكرة؟ والشيء التاني بتحس انه المسلسل اله علاقة بحياتها الخاصة لوهلة، بتحسها بتقول رسالة لزوجها اللي تركها ، وكيف هي راح تحب . سوسن بدر شو هالجمال والشيب ووقار الكبر ..الله اكبر .
.بشكل عام المسلسل يعني مش عاطل كثير، وياسمين عبد العزيز بدون شك محترفة بالتمثيل،.
واستعراضها واضح…
اما ضرتها، او العروس اللي اخدت زوجها اللي طلقها رهام حجاج بمسلسل لما كنا صغيرين، غير انها باربي رسمي، يعني بتحس انه ممكن الواحد يعرضها بفاترينا ، متصنعة وما بتعرف تمثل وبتذكرني بهيفاء وهبي باول مسلسل الها. بس طبعا وين هي ووين هيفاء.. هيفاء ديفا حقيقية، مش بلاستيك طالع من قالب من المصنع وحاطين قدامه كينت (كينت زوج باربي) اللي بالمسلسلات المصرية بكون خالد النبوي.
يعني باختصار، ياسمين صبري، زينة، دينا الشربيني ، ورهام حجاج واضح انه في حدا زاققهم علينا… ومنعرف طبعا مين هذا الحدا…
ياسمين عبد العزيز، وغادة عبد الرازق لو يبطلوا يدخلوا بتنافس لعرض الامكانيات ويقولوا نحن منقدر نعمل كل شيء واي شي بطلعوا اكيد احسن. لانه ببقى في فرق واضح بين الشطارة والحرفية بالتمثيل وبين تمثيل بسياق مناسب ، يعني الشكل والدور والشخصية يكونوا مناسبين مع النص واللي بيلبق واللي ما بيلبق، مش سلطانة المعز بشكل هوانم التجمع الخامس.
مسلسل مقابل مع السيد ادم، برىي انه مسلسل حلو، وجيد. الحلو بالمسلسلات السورية الللي لسة بتنعمل بسورية انه بكونوا ماخدين شركة بيجامات مقاولة. مستحيل ما نلاحظ كمية البيجامات اللي كل الممثلات بيظهروا فيها.
اما مسلسل اولاد ادم، فما فيه بيجامات لانه صور بلبنان، فاستعراض ودانييلا بترقص مثل نانسي عجرم وماكسيم لسه عايش بدور المسلسل تبع رمضان السابق، يعني مكسيم شاطر، ولكنه متل باسل خياط لبسته شخصية ومستمتع فيها.
على سيرة باسل خياط، عمل خير انه عمل مسلسل قصير، يستحق التقدير على مغادرته بسرعه.
مسلسل سوق الحربر او الحريم مش عارفة، حضرت كم مشهد وما قدرت اتحمل الوجوه المحنطة اللي متحول الها الممثلين. توووو ماتش مكياج طلع البدري والوخري من كل رقص دانييلا وهي مفكرة حالها دينا.
مسلسل سكر زيادة، الحقيقة الواحد بس بقول : ارحموا عزيز قوم ذل… لا تعليق.
واخيرا… نيلي كريم وكل ممثل شارك بهذا المسلسل حتى اخر مشهد… ابدعوا … شيء خارج عن المألوف، غير مكرر ،بطولة جماعية، ونص وفكرة متينة
وطبعا اسر ياسين… اسر قلبي …
في كم اغنية بتتر المسلسلات يعني بدخلوا التاريخ، اغنية الطيبين لمصطفى حجاج بخيانة عهد، واغنية مدحت صالح بنحب تاني ليه…. بجد روعة…
وطبعا بكرة حبقى مليونير بتعمل تتمة كما بداية لروعة بمية وش.
ورمضان يجمعنا السنة الجاي ان شاء الله