متى نتدارك امر التطبيع ونناقشه بشفافية ومصداقية ؟

https://www.haaretz.com/middle-east-news/palestinians/.premium.MAGAZINE-palestinian-prime-minister-to-haaretz-the-fact-that-we-even-survive-is-a-miracle-1.8432897

وصلني هذا الفيديو عالريق. اتطلعت اكيد وفهمت المقصود من ارساله ، اولا على الخاص وثانيا عدم تعميمه على صفحة شخص ما بعينه .

بالنسبة الي كان في مؤشرات مباشرة : بنك هبوعليم ومركز جماهيري بيت حنينا.

الحقيقة قبل ما افكر بقرب المكان اللي هو مقابل مكان سكني وببنك هبوعليم اللي انا فاتحة حساب فيه، خطر ببالي على طول موضوع المغني عزيز مرقة وحفلته واستخدام كلمة بنك ماركنتيل ووزارة الثقافة الاسرائيلية لانتقاد وتجريم وفضح الحدث والمغني المشارك.

وكنت اشرت حينها لمقاربة موضوع بازار كريسمس باللي بيصير بالقدس، بازار ممول من بلدية القدس الاسرائيلية وصناديق صهيونية اخرى بالشراكة مع جمعية محلية عربية.

بعني نفس الموضوع…

هلأ وبعد الهجوم المدوي اللي صار على عزيز مرقة بموضوع الحفلة و”صهينتها” من حيث تمويلها، واصدار صكوك الوطنية وسحبها لعزيز مرقة من المفترقين منا كفلسطينيين منعطي الحق والصلاحيات باصدار الصكوك الوطنية ، ما بقدر الا اني اتوقف عند هذا الحدث المرتقب وافكر، شو اللي لازم ينعمل ؟ الناس المشاركة اللي هي بفكر وطنية وتصدر متلي صكوك وبتسحبها، ليه بتشارك بهيك فعاليات واضح جدا كيف تمويلها، خصوصا مع التأكيد كثير على اهمية موضوع الثقافة والتعليم فوق كل شيء خصوصا بالقدس.

بيخطر ببالي اسأل ليه ما بطلع مبادرات دائمة من هذا النوع وعلى طول السنة ، يعني المراكز الثقافية ومتعددة الاتسخدامات عنا ولا اكثر منها ، الفعاليات اللي ممكنة موجوده وبكثافة ، وانا لو كنت محل المشاركين من شخصيات فنية ، اكيد راح افضل يكون تقديمي بمؤسسة ثقافية فلسطينية مش مؤسسة تبعيتها اسرائيلية. بتخيل الكتب الموجودة ، وبتخيل كمان بدون ما افكر كتير بين موضوع الهجوم على سداو ومطالبة لجنةاولياء مدارس القدس التربية والتعليم بسحب او ازالة ما هو متعلق بسيداو بالمناهج، وبالتالي تعليقات الامهات والاباء يمكن والطلاب بضرورة تمزيق او حرق هذه الكتب، همه نفسهم اللي راح يكونوا بهذه الفعاليات خصوصا اذا كانت قريبة من مكن سكنهم. واليوم ما شاءالله بيت حمنينا صارت مركزية اكتر من وسط القدس ، الواحد بحس حاله بالعاصمة ، يعني راح ييجي على هذه الفعاليات ناس من كل احياء القدس.

يمكن في نقطة مهم نواجهها بموضوع عدم استقطاب المجتمع المحلي بالقدس بالرغم من وجود فعاليات هنا وهناك ، اولا ، نخبوية الاستهداف الثقافي وبالتالي المراكز الثقافية ، يعني كل واحد اله نخبته ، في مراكز بتستقطب النخب الاجتماعية و في مراكز بتستقطب الطبقات اللي بدها تصير نخب، وفي مراكز بتفكر حالها نخب، وفي ناس فاتحتها يد عليا على يد سفلى وعاملتها احسان وتبرعات وتصوير وعشاء خيري واطعام مساكين. يعني فجوة بين النخبة والمساكين. وبتيجي المراكز الجماهيرية المدعومة ومدارة من قبل بلدية القدس الاسرائيلية بتعبي هذه الفجوة .

لما اشوف عرض ١٠ كتب ب ١٠ شيكل للكتاب، الحقيقة بفكر بكتابي المعروض ب ٥٠ شيكل ، مع التبرير بانه لسه جديد واول نزلته))) وغير موضوع تكلفة لكتاب من ٤٠٠ صفحة. ولكن كمان بخطر لي مكتبة القدس – يمكن يكون هيك اسمها الموجودة بالبلدة القديمة بطريق خان الزيت اللي انا اشتريت منها برمضان الفائت كتب بنفس هذا العرض. يعني في امكانية عمل عروض بنفس الطريقة اذا ما تم عمل او المبادرة لعمل هيك اشي.

المشكلة وين، انه جماعتنا بعد ما يعترضوا على هذا الحدث ويشجبوه، راح يبادروا لشيء بشبهه. وهيك نحن منعمل داىما ردود فعل وعلشان هيك ما بتزبط معنا .

يعني الواحد لما يشوف الكم الهائل من الناس اللي بتكون بالكوفي شوبات والمطاعم ومحلات الحلويات والالعاب ببيت حنينا بحس حاله بشارع الاستقلال باسطنبول.

اللي بخليني اروح على محل تاني من الملاحظات وهو التاجر ، سواء صاحب محل او صاحب مكتبة او صاحب سوبركاركت او صاحب محل ملابس او اكسسوارات ، ليه ما عم بينجح انه يستقطب الناس بنفس القدر اللي المحلات الاسرائيلية عم تعمل . يعني قديه نحن منقدر نقنع الناس ما تروح تشتري من فوكس اللي بتشتري الام فيها كسوة لاولادها بعروض التلاتث قطع بمية شيكل مثلا، وبتروح على محل الملابس بالقدس اللي بكون يبيع اوتليت الله يعلم من وين اللي بتكون القطعة ب ٣٠٠ شيكل؟ كيف بدي اقنع صاحب العيلة اللي لازم يطعم خمس او سبع او عشر افراد بانه الفرقية بشيكل بكل منتج بتخليه يطلع بكمان خمس اكياس زيادة ؟

في خلل مش عم بقبل حدا يعالجه الا من خلال التذمر بسبب الغلاء للمستهلك واصدار صك التطبيع من قبل المورد. والمورد هون ببدا من مركز ثقافي لمحل خضرا. كله ماشي بنفس النهج.

وفي سياق اخر ولكن متصل بما انه بنحكي عن صكوك التطبيع ، قامت القيامة ضد عزيز مرقة بعد مقابلته بهآرتس، وبيجي بعدها بيومين او تلاثه مقابلة لرئيس الوزراء الفلسطيني مع هآرتس.

طيب ليه عزيز مرقة مطبع وممنوع انه يعمل اللي عمله ورئيس الوزراء اللي من اول ما صار رئيس وزراء وهو بيحكيلنا عن الخطط العنقوديه بالانفكاك عن الاحتلال . بجد مين اللي لازم نحاسبه المغني اللي عباب الله والا رئيس الوزراء اللي بده يحررنا؟

ورجاء ما تقولوا لي السلطة ما بتثملنا. السلطة بتمثلنا لاننا منعمل كل شيء على حسب وجودها ، لو ما بتمثلنا بجد كان هي مش موجوده لهلأ.

برأيي صار وقت انه نعمل مراجعة حقيقية للممكن الوطني واللي مش ممكن ونعيد النظر في صياغتنا لتعريف التطبيع . لانه هيك نحن راح ندخل بشيزوفرينيا خطرة ونصير مثل dr jeckle and mr hyde منفيق بشخصية ومننام بشخصية

اترك رد